Programming



شلون أدرس البرمجة؟


Programming

Education

2018-01-17


البرمجة هي علم وموهبة ، هي أسلوب تفكير ، هي تدريب الدماغ على التفكير بأسلوب معين لحل المشاكل ، لغات البرمجة هي الوسائل والأدوات اللي تساعدك على تحويل فكرتك بحل المشكلة إلى برنامج قابل للتنفيذ على الحاسبة بإستخدام أي أداة (لغة برمجية مناسبة للمشكلة المراد حلها).

مراحل دراسة البرمجة

  1. قراءة الموضوع ، أو الإستماع إلى محاضر ، أو فديو تعليمي أو كتاب لتكوين الفكرة الأولية
  2. حل التمارين مع تسجيل الملاحظات وربطها بحل المشاكل بالواقع العملي
  3. تطبيق الأمثلة على الحاسبة ، وإختبار النتائج وتسجيل الملاحظات خصوصاً عند الحصول على نتائج غير متوقعة ، السؤال من ذوي الخبرة في هذا المجال أو البحث في الإنترنت عن سبب ظهور النتائج الغير متوقعة، التطبيق في البداية راح يكون هو عملية نقل الكود البرمجي مثل ما موجود بالكتاب وتنفيذه على الحاسبة ولكن بالحقيقة مو هذا المطلوب حته تصير مبرمج.
  4. المطلوب من تتعلم مجموعة من المفاهيم البرمجية والأدوات اللي تساعدك بحل المشاكل (مثل المتغيرات وأنواع البيانات والـ if-else و loops و functions وغيرها) لازم تتعلم شلون تربط بينهن حته تحل أي سؤال.
  5. ورة ما تضبط الأساسيات تحاول تبني برامجك ومشاريعك الخاصة مهما كانت بسيطة وصغيرة ، learning by doing لأن من تكوم تشتغل وتكتب كود من تفكيرك راح تجيك كومة أفكار وراح تطلعلك كومة مشاكل ، راح تضطر تحلهه وحدة وحدة ، ومن راح تحلهه راح تزيد خبرتك البرمجية ومو بس هاي راح تترسخ المعلومة عندك ومراح تنساهه أبد ، مو مثل ما تقره المعلومة أو تسمعهه من واحد ممكن تنساهه ورة خمس دقايق.

فالمبرمج حته يعرف نفسه هوه صار مبرمج هو مو الشخص اللي يعرف كلشي بلغة برمجية معينة أو اللي يعرف عشر لغات أو عشرين لغة لا، المبرمج هو الشخص اللي فهم أساسيات لغة معينة والتراكيب مالتهه ويكدر يربط بيناتهه حته يحل أي مشكلة تواجهه. أي بمعنى آخر (عنده تفكير برمجي). هذا راح تشوفه يكدر يتعلم أي لغة بوقت كلش قصير لأن هوه ضبط الأساسيات ودرب مخه على التفكير البرمجي بالتدريب المستمر ، فبس يتعلم طريقة كتابة الإيعازات بهاي اللغة الجديدة ورأسا يكوم يكتب برامج.

من أهم الأمور اللي تسويلك مستقبل بالبرمجة

  • لتعتمد على الجامعة بكلشي ، انته طور نفسك واسبق الزمن
  • شكد ما بيك ضبط الإنكليزي
  • تعلم شلون تبحث عن المعلومة وتعب نفسك ولا تاخذ كلشي جاهز
  • لازم تسويلك حساب عله github و stackoverflow حته تشوف العالم شجاي تسوي وشجاي تسأل وشلون ديجاوبوهم
  • لتستحي إذا محصلت اللي تريده بالبحث بأن تسأل
  • البرمجة معرفة تراكمية ، وكل مفهوم أو موضوع مبني على أمور قبله ، فلا تستعجل الأمور ، إضبط الموضوع ياله تنتقل للي بعدة ، سوالف تعلم البرمجة بأسبوع ، وتعلم البرمجة بيومين وتعلم البرمجة بعشر دقايق ، هاي أمور مو صحيحة

Back to Articles